第一站 分享甜到漏手造焦糖饼
Sweet Sweet来到长洲拍拖，当然要食一啲好sweet嘅嘢，呢间小店嘅焦糖饼係即叫即整，仲可以拣饼上面嘅图案，拍拖喎，梗係拣心心啦！
店主将煮热嘅砂糖，加入云呢嗱油同梳打粉，待糖浆发胀后，放上金属板再压扁，印上图案就完成！焦糖饼口感十分脆！食落係浓浓嘅焦糖香，有少少苦涩味。不过一个人食比较腻，最好同BB猪开心share(希望佢唔好食完又嗌要keep fit啦！)
海盗王张保仔
地址：长洲新兴后街152号地下(显示地图)
联络电话：6130 7939
第二站 情人锁留影
继德国、美国、南韩之后， 长洲 都有可以挂情人锁嘅地方啦！同BB猪唔使搭飞机都可以浪漫下！
啲情人锁远睇就五颜六色十分靓，但一行埋去近睇，部份锁嘅金属位都生咗锈，所以影Selfie时唔好「跟锁太贴」喇！
买锁去对面B&B舖头就得，不过$30个就真係唔太抵，但爱情嘅嘢，都係无得计咁多架啦……如果真係要为将来结婚计数的话，自备情人锁又得唔得呢？即係咁，场边有个伯伯长期在铁丝网边「打趸」，见有人将其他的锁放上去之时，就会埋嚟「关心」吓，唔知算唔算唔得呢！
情人锁
地址： 长洲 东湾路12-14号(显示地图)
第三站 创意甜品店撑枱脚
去 长洲 ，唔少人都锺意买返个平安包食，兼做手信。不过同BB猪出嚟，食平安包又好似唔係咁啱Feel喎，唔知有平安字样嘅马卡龙又啱唔啱佢嘅胃口？
马卡龙嘅味道係香片茶味，味道芳香，唔会太甜。
第一眼见到以为係心太软，一样都係有啲朱古力浆流出嚟，但点知食落去係冻架！原来係朱古力慕斯嚟！
脆皮朱古力外壳下係软滑慕斯，慕斯下层係海棉蛋糕及曲奇饼底。
呢度嘅甜品师Keily，整甜品嘅功架原来係自学！哪里来的勇气？原来係基于一个情字，因为佢个BB猪锺意食甜品啰！So Sweet！
U Can Cook
地址：长洲海傍街91A地下及82号全幢(显示地图)
营业时间：12:00pm-10:00pm(逢星期四休息)
联络电话：2981 6533
第四站 孖住游卖艺手作小舖
看完情人锁，吃过焦糖饼，又要周围行下，近东湾泳滩，有一间小店，长期都人头涌涌，里面卖的，大部份产品都是人手製作或设计，好啱同锺意文青feel嘅BB猪行下。
由本土工作室製作，将香港美食变成袖珍饰物。
飞行棋、维他奶充满集体回忆，手绘风设计更显怀旧。
陶瓷碗图案精緻，可放生果、沙律或饰物。
手镯由结他弦线整成，中间穿上珠仔，型得嚟又带点可爱。
卖艺
地址：长洲东湾路庆安台3号地下(显示地图)
营业时间：11:00am-7:00pm（逢星期二休息）
第五站 后街欧陆小店搵信物
穿过横街小巷，就会搵到Nitti-gritti，门口设计令人印象深刻，咁细嘅舖面，但有齐窗户、大门、台阶、而且仲泊咗架复古造型单车喺门口，充满欧陆风，入店就好似去探朋友嘅，好有亲切感。(同BB猪又多一个影相点！)
店主Packy于墨尔本读书期间，经常行当地嘅Brunswick Street，街上有各式各样嘅小店，间间都好有风格，回港后，Packy希望喺自己嘅居住地- 长洲 ，开一间有自己风格嘅小店，好型呀~！
店内货品都係店主由世界不同地方採集回来，来自苏格兰、丹麦、韩国等地嘅精品及生活用品，亦都香港手作人製作嘅饰物。(太多野拣，记得锡住另一半荷包！)
由苏格兰设计师製作，走复古少女风路线，陶瓷公仔有多款造型，有小狗同小羊等。
南韩插画师Jaesun设计，作品富童话味道。
本土手作人製作，手工细緻。
店主自家设计嘅抱枕，不少客人买来做新婚礼物。
店主问年轻 长洲 纸扎师傅特别打造，作为店内装饰。
店主爱犬Alloy帮忙「睇舖」，十分聪明，而且很亲人。
Nitti-gritti
地址：长洲新兴后街105号(显示地图)
营业时间：星期四、五(12:00pm-06:00pm)、星期六、日(12:00pm-07:00pm)
联络电话：3689 1242
第六站 码头看日落
食到饱，行到攰，又仲未够钟搭船？其实喺码头附近睇到嘅日落係好靓架！我都知睇日落有啲娘，但桥唔怕旧，最紧要受！如果当日个天唔厚云，仲会见到鹹蛋黄添！
